XOVES 2A: REPASO LINGUA, TERMINACIÓNS E VERBO

Bos días.

1. Corrección de actividades "Terminacións" páx. 194: ide a este enlace.

2. Repaso do verbo: 

• Verbos regulares (páx. 8 do apéndice do libro): cantar, coller, partir. Podedes estudalos (cando sexa o exame) polo libro ou por estes enlaces da RAG: cantar, coller, partir. Non estudedes o futuro de subxuntivo. 

• Verbos con alternancia na vogal da raíz (pp. 9-10 apéndice): modelo beber, comer, advertir, servir, durmir. Só hai que saber o presente de indicativo destes verbos.

• Verbos irregulares: tedes neste documento unha ficha para completar (pp. 1-2) e as solucións (pp. 3-4). Esta actividade é opcional. Podedes facela cando poñamos o exame de "Repaso de Lingua".

	Terminoloxía do libro	Terminoloxía da RAG
Indicativo	Presente	Presente	canto
	Copretérito	Pretérito imperfecto	cantaba
	Pretérito	Pretérito perfecto	cantei
	Antepretérito	Pretérito pluscuamp.	cantara
	Futuro	Futuro	cantarei
	Pospretérito	Condicional	cantaría
Subxuntivo	Presente	Presente	cante
	Pretérito	Pretérito imperfecto	cantase
Imperativo			canta
Infinitivo conxugado			Cantar, cantares…
Infinitivo			cantar
Xerundio			cantando
Participio			cantado

Eu prefiro usar a terminoloxía da RAG.

3. Libro de lectura:

• Como sabedes, decidín poñer 1 único libro de lectura "obrigatorio" para a 2ª e 3ª .
• Os que queiran ler dous, poden facelo: é voluntario; no caso de examinarvos (oralmente) de dous libros, poría a nota máis alta.

Como conseguir os libros?

Se non tedes o libro na casa, podedes acceder a libros en bibliotecas virtuais:

• GaliciaLe. Só tes que rexistrarte (sen necesidade de ir a ningunha biblioteca) e coas claves que recibirás, accederás ao catálogo virtual. Cando remate a corentena, disporás de 30 días para achegarte á biblioteca a solicitar o carné e seguir gozando das vantaxes de GaliciaLe.
• Bivir (asociación de tradutores galegos). Ide na pestana superior a "Bivir", logo a "Catálogo de Obras" e podedes seleccionar por tradutor (non interesa), ou por título, autor (é o que interesa). Non todas as obras son adaptadas á vosa idade; se escolledes algunha, preguntádeme antes se é adecuada.

Ata despois de Semana Santa. Aproveitade para organizar o material e non esquezades pasalo o mellor que poidades.

MARTES 31M: REPASO LINGUA, H, TERMINACIÓNS

Bos días. 

Hoxe continuaremos co repaso de Lingua:

• Unidade 6, páx. 141. Uso de h. 
• Unidade 8, páx. 194. Algunhas terminacións. 

• Da unidade 6, teredes que saber para o exame como se escriben (con/sen h) as palabras que aparecen na páx. 141 do libro. Non é necesario facer actividades. Pero, se queredes facelas, tedes neste enlace o exercicio 9 (insisto: é voluntario). Hai unha razón para que ás veces unhas palabras se escriban con b en galego e con v e castelán e viceversa. O mesmo ocorre co uso ou non uso de h. Aquí tedes un enlace a un documento no que podedes ver como se escriben en galego e castelán algunhas palabras deste tipo; na páxina 3 do mesmo documento veredes como se escriben noutras linguas: mirade esta páx. 3 e seguro que levades unha sorpresa. Ou... Por que credes que en galego se escribe Henrique, Helena? Como se escriben en inglés? Pois si: Henry, Helen. E o teléfono móbil en galego, móvil en castelán? Pois en inglés mobile, con b. Non hai que saber as palabras deste documento.

• Da unidade 8, para o exame, tedes que saber as palabras que aparecen no libro con terminacións en -nte, -mento, -za/-cia, -zo/-cio, -zón/-ción que están na páx. 194, tanto as da teoría como as das actividades. Polo tanto, tedes que facer as actividades 1, 2, 3, 4, 5 e 6 da páx. 194. 

• O xoves 2 de abril corrixiremos as actividades da páx. 194 (recordade: esas palabras das actividades entran no exame) e comezaremos co repaso do verbo. Adiántovolo hoxe por se queredes ir mirando algo do verbo. O xoves veremos os verbos regulares (páx. 8 do apéndice do libro) e os verbos con alternancia (pp. 9-10). Recordade:

	Terminoloxía do libro	Terminoloxía da RAG
Indicativo	Presente	Presente
	Copretérito	Pretérito imperfecto
	Pretérito	Pretérito perfecto
	Antepretérito	Pretérito pluscuamp.
	Futuro	Futuro
	Pospretérito	Condicional
Subxuntivo	Presente	Presente
	Pretérito	Pretérito imperfecto
Imperativo
Infinitivo conxugado
Infinitivo
Xerundio
Participio

Eu prefiro usar a terminoloxía da RAG.

Ata o xoves.

LUNS, 30M: REPASO LINGUA, PP

Bos días.

Ánimo, que esta é a última semana antes das vacacións de Semana Santa. E en Semana Santa non vou mandar tarefas obrigatorias, obviamente. 

Hoxe tedes que rematar os exercicios do pronome persoal que están na entrada anterior. Mañá seguiremos co repaso de Lingua (unidade 6 e 8: uso de h, algunhas terminacións). Logo continuaremos co repaso do verbo (tema 7) e pasaremos a outro bloque da materia

E recordade a necesidade de organizar o material. 

Ata mañá.

XOVES, 26M: REPASO LINGUA, PP

Bos días.

Corrección dos exercicios da páx. 119: Entra neste enlace ou na aula virtual de 4º A para poder corrixir os exercicios.

Outras actividades:

Como xa respondestes ás cuestións deste documento, non vos será difícil facer as seguintes actividades no voso caderno. Pero, antes, escoitade a Pepe, que vos fai un repaso rápido:

Pronome persoal tónico e átono. Localización nun texto e función sintáctica.

• Sinala os pronomes persoais e a súa función (as 10 primeiras).

Contracións dos pronomes átonos. Atención a lle/lles + o, a, os, as.

• Exercicios 3 e 4 deste enlace.
• LLO... -LLELO... (as 10 primeiras). Se che sae mal, continúa.

Pronominalización.

• Substitúe por pronomes (as 10 primeiras).

Uso de te/che.

• Actividades: Exercicio 1 e 2 deste enlace (as 10 primeiras de cada un).

Se che sae mal, tes estas actividades de reforzo para practicar: TE-CHE

Colocación do pronome átono.

• Exercicios 1, 2, 3, 4 deste enlace.

Se che sae mal, tes estas actividades de reforzo para practicar: Colocación dos pronomes átonos.

Mañá non temos clase. Penso que vos dá tempo a ter rematado o pronome persoal o martes. Todos os exercicios propostos teñen a solución no propio enlace. Facédeos primeiro no caderno, e logo comprobade se as respostas son correctas. De non selo, corrixide. Se hai algunha cuestión que non saia ben, seguide practicando. Pero recordade: suponse que isto é "repaso" e se sabe de anos anteriores. Xa o sei: o pronome persoal non é fácil.

Se tedes dúbidas, escribídeas como comentario nesta entrada.

Ata o luns.

MARTES, 24M: REPASO LINGUA, PP

Actividades Pronome Persoal.

Para hoxe, actividades 1, 2, 3 e 4 da páxina 119 do libro. Facédeas no caderno.

Na próxima sesión, corriximos e marcamos máis actividades.

Ata o xoves.

LUNS, 23M: REPASO LINGUA, PP

Entrade na imaxe para escoitar a Pepe. Ten algo que dicirvos.

Bos días. Dúas cuestións:

1ª cuestión. Para hoxe, Pronome persoal: Teoría. 

  

Comezamos hoxe de forma teórica, repasando conceptos de anos anteriores sobre o pronome persoal. 

Entrade na aula virtual  ou neste documento. Nel aparecen:

1. As cuestións que hai que dominar para un futuro exame. 
2. Unha serie de cuestións (pp. 1 a 3) que debedes responder. 
3. As solucións a estas cuestións (pp. 4 a 6). 

Na aula virtual tedes o documento en PDF e nun formato que se pode editar, para quen non poida imprimir e decida contestar no ordenador.

Intentade responder as cuestións sen mirar as solucións. Non consiste en cortar e pegar. Así non aprenderiades nada.

Mañá marcarei actividades sobre o pronome persoal.


2ª cuestión. Antes de perdernos, imos organizarnos co resto da materia.

Pincha sobre a imaxe para ampliala.

Este é o material que aparece nas distintas unidades do libro de texto. Da 2ª avaliación vimos Literatura e Sociolingüística. Quédanos por ver:

• Texto (prescritivo, argumentativo / xéneros de opinión, publicidade).
• Repaso de Lingua: Pronome persoal. Uso de h. Verbo. Terminacións.
• Lingua: Sintaxe.
• Texto: Currículo, blog, instancia, folleto…
• Vocabulario: verémolo todo xunto, ao final coas “relacións semánticas” (tema 11).

Ata logo.

MARTES, 17M: SOCIOLINGÜÍSTICA

OS PREXUÍZOS LINGÜÍSTICOS (páx. 199)

Tedes que saber:

• Concepto.
• Galicia desde o séc. XVI. Situación do galego e do castelán.
• Na actualidade.
• Prexuízos que subsisten: utilidade / rural / imposición / marca ideolóxica / dialecto / artificial / non apto para a ciencia. Explicación de cada un deles.

Actividades.

1. Neste artigo sobre os prexuízos lingüísticos aparece, no punto 4 unha ”Clasificación dos prexuízos a respecto do galego”. En concreto, diferencia 6 tipos de prexuízos. Resume brevemente en que consiste cada un deses 6 prexuízos.
2. No mesmo artigo, no punto 2, explica “Os prexuízos lingüísticos no mundo”. Fai no teu caderno un cadro (ou un esquema) con estes tipos de prexuízos.:

	Tipo	Breve explicación
Prexuízos inocentes	a)
	b)
	c)
Prexuízos culturais	a)
	b)
	c)
Prexuízos xeopolíticos	a)
	b)
	c)

Con isto, rematamos Lingua e Sociedade da 2ª avaliación, e tamén as clases desta semana (mércores non hai clase, xoves é festivo e venres, ponte).

Ide marcando unha data para examinarvos desta parte (Lingua e Sociedade).

Ata a próxima semana.

LUNS, 16M: SOCIOLINGÜÍSTICA

Bos días.

Continuamos con Lingua e Sociedade. Vimos "A Lingua galega na posguerra" (tema 5), "A lingua galega a partir de 1975" (tema 6). Queda por ver "A lusofonía" (tema 7) e "Os prexuízos lingüísticos" (tema 8).

Hoxe veremos a LUSOFONÍA (pp.170-171, tema 7). Hai que saber:

6.1. O Galego e o portugués.

• Orixe do galego e do portugués.
• O nacemento do galego-portugués no séc. IX. Territorio. Idade Media.
• Linguas romances faladas na Península na Idade Media (no mapa, páx. 170).
• Séc. XII: Independencia de Portugal. Galicia na coroa de Castela. Separación: dous idiomas.
• Galicia: pertence a Castela. Expansión de Portugal. Consecuencias para a lingua galega e a lingua portuguesa.

6.2. A lusofonía.

• Concepto.
• Repercusión da facilidade de comprensión entre o galego e o portugués:
• Comunicación. Facilidade de comunicación dos galegos con aproximadamente 200 millóns de cidadáns que falan portugués.
• Economía. Facilidade de acceso ao mercado laboral dos países lusófonos.

Actividade: Le este texto da Wikipedia:

"O reintegracionismo é unha postura lingüística que defende que o galego é unha variedade da lingua portuguesa ou no ámbito científico, galego-portuguesa. Polo tanto, as diferentes falas galegas serían, como as portuguesas, parte do mesmo diasistema lingüístico e, como consecuencia da procura da converxencia entre o galego e o portugués, propón a adopción dunha grafía baseada na norma portuguesa. (...)

O sector lusista defende a adopción directa do padrón portugués".

Ricardo Carvalho Calero (autor ao que se adican as Letras Galegas 2020) defendía o reintegracionismo. As normas actuais non seguen esta postura; foron elaboradas pola RAG e polo ILG (Instituto da Lingua Galega), como vimos na páx. 144, último parágrafo.

Preguntas:

1. Cal cres ti que é a postura correcta, a oficial ou a que avoga polo reintegracionismo? Razoa a resposta.
2. Como deben publicarse os poemas de Carvalho Calero, no galego estándar (oficial) ou tal como este autor os escribía (reintegracionista/lusista)? Razoa a resposta.

Para mañá, os PREXUÍZOS LINGÜÍSTICOS. Indicarei a forma de preguntar as posibles dúbidas.

BENVIDOS

A partir do próximo luns 16 este será o noso caderno de traballo. Irei marcando materia e actividades cada día.
Ata o luns.